असन्तुष्ट कांग्रेस जिल्ला समापति भेला _ सुदूरपश्चिमबाट को–को ?

कांग्रेस सभापति शेरबहादुर देउवासँग असन्तुष्ट वरिष्ठ नेता रामचन्द्र पौडेल, कृष्ण सिटौला पक्षको भेला केहीबेरमा पार्टी केन्द्रीय सानेपामा हुँदैछ । सहमति प्रयास भइरहेका बेला देउवाले एकपक्षीय रूपमा निर्णय गरेको भन्दै असन्तुष्ट पक्षले त्यसलाई सच्याउनका लागि दबाबस्वरूप भेला तय गरेको जनाएको छ।

७७ जिल्ला मध्ये देउवा निकट ३५ र इतरका ४२ जना सभापति रहेका छन्। सुदूरपश्चिममा पौडेल, सिटौला समूहका जिल्ला सभापतिहरुको सङख्या तीन मात्रै छ। दार्चुलाका सभापति ललित सिंह बोहोरा, देउवाको गृह जिल्ला डडेल्धुराका सभापति कर्ण बहादुर र बैतडीका सभापति नरेन्द्र थापा असन्तुष्ट कांग्रेस जिल्ला समापति भेलामा सहभागी हुनेछन्।

केन्द्रीय कार्यसमितिको पुस ११ को बैठकले महाधिवेशन कार्यतालिका सार्वजनिक, विभाग संख्या दोब्बर बनाउनेलगायत निर्णय बहुमतबाट गरेपछि पौडेल पक्ष विरोधमा छ। देउवाले अर्को वर्ष फागुन ७ देखि १० गतेसम्म १४ औं महाधिवशेन गर्ने, विभाग संख्या २८ बाट ४७ बनाउने तथा नेपाल तरुण दलको समयावधि ६ महिना थप गर्ने निर्णय बहुमतका आधारमा लिएका थिए।

के हो असन्तुष्टि ?
वरिष्ठ नेता रामचन्द्र पौडेल, पूर्व महामन्त्री कृष्णप्रसाद सिटौला, महामन्त्री डा शशांक कोइराला, प्रकाशमान सिंह, डा रामशरण महत लगायतको असन्तुष्टिबीच पनि केन्द्रीय समिति बैठक डाकेर सभापति शेरबहादुर देउवाले १४ औं महाधिवेशनको कार्यतालिका ल्याउनुका साथै विभाग गठन गरेपछि इतर पक्षको आक्रोश बढ्दो छ ।
केसी भन्छन्, ‘बहुमतका आधारमा पार्टीका विधानहरु निलम्बन गर्ने काम भएको, २८ वटा विभाग बढाएर ४८ वटा बनाउने काम भएको र १३ औं महाधिवेशनको कार्यसमितिलाई १४ औं महाधिवेशनले संवोधन गर्नुपर्ने परिस्थिति छ ।’
महासमितिको बैठकले गरेका निर्णयलाई बहुमतको आधारमा केन्द्रीय समितिले उल्टाएपछि यसअघि पनि जिल्ला सभापतिहरुले असन्तुष्टि जनाउँदै आएका थिए ।
केन्द्रीय समिति आफैले गरेका निर्णयलाई दुई महिना टिकाउन नसकेर त्यही धारा निलम्बन गर्ने काम भएको भन्दै असन्तुष्टि चुलिएको छ । अधिवेशनलाई प्रभावित पार्ने काम भएको भन्दै चर्को असन्तुष्टि छ ।