कस्का दल बलले दलालहरुको दाउ बढ्यो बेसरी
कस्का दल बलले दलालहरुको दाउ बढ्यो बेसरी ।
बण्डा भाग गरेर जन्मभूमिको, घाउ बढ्यो बेसरी ।।
कोही भन्छ मधेसी हू म बलियो, कोही हिमाली अरे ।
मेची काली मधेस हिम शिखरको दुरी बढ्यो बेसरी ।।
थुंगा फूल सयौं मिलेर बलियो, माला उनेको थियो ।
जाती वर्ण सबै मिलेर रहने, एउटै बगैंचा थियो ।।
माली नै परहोसको मद चढी, फीका भयो केसरी ।
बण्डा भाग गरेर जन्मभूमिको, घाउ बढ्यो बेसरी ।।
बाँझै छन् सब खेतबारी बनको, बुटी त्यसै नासियो ।
युवाको श्रम खाडीका बगरमा, बेभाउ नै बेचियो ।।
हाम्रा खानी खनिजको फगतमा, भाउ घट्यो बेसरी ।
कस्का दलबलले दलालहरुको, दाउ बढ्यो बेसरी ।।
सिता भृकुटीको अगाध ममता, सिद्धार्थको बुद्धता ।
शान्ति मैत्री र पञ्चशील नीतिले, सम्बन्धमा सुद्धता ।।
यो सारा फितलो गराई खबरी, डुल्दैछ नानाथरी ।
हाम्रो पौरखी तारतम्य बलियो, दुर्बल बन्यो के गरि ।।
दौरा औ सुरुवाल चोली र गुन्यू, हक्कु पटासीहरु ।
मारुनी सखि सोरठी र छलिया, ट्याम्का र झ्यालीहरु ।।
हाम्रा भेषभुषा र संस्कृति किन, घट्दै गए बेसरी ।
रोदीमा मिनि स्कर्टको गजबको, चाला चल्यो के गरी ।।
सिमा स्तम्भ सरे मुहान नदिका, खै के गरि फेरिए ।
मन्चै बाट फलाकिने अमनका, नारा पनि फेरिए ।।
पुर्खा पौरख बिरको रगतको, भाउ घट्यो के गरि ।
कस्का दल बलले दलालहरुको, दाउ बढ्यो बेसरी ।।
हाम्रै बर्कतले अवस्य पनि यो, चम्किन्छ सानो घर ।
हाम्रा कर्म सधैं फलीभुत बने, यो देश कै खाँतिर ।।
युवाको श्रम सीप कौसलहरु, ब्यर्थै नहोस् क्यै गरि ।
मेची काली मधेस हिम शिखरको नाता बढोस् बेसरी ।।
