अफगानिस्तानका नेपालीको पूर्ण सुरक्षाको व्यवस्था होस- राप्रपा

काठमाडौं । राष्ट्रिय प्रजातन्त्र पार्टीका अध्यक्ष त्रय कमल थापा, डा.प्रकाश चन्द्र लोहनी र पशुपति शमशेर राणाले अफगानिस्तानमा सुरक्षा संकट खेपेका १४ हजारभन्दा बढी नेपाली नागरिकलाई स्वदेश फर्काउन सरकारसँग आग्रह गरेका छन्‌। यो कार्यमा आलटाल नगर्न र उनीहरुको पूर्ण सुरक्षाको व्यवस्था गर्न पनि उनिहरुले सरकारलाई सुझाएका छन्‌।

अफगानिस्तानको राजधानी काबुलबाहेक प्रमुख शहर तालिबान विद्रोहीले कब्जामा लिएको कुरा अध्यक्षत्रयबाट जारी विज्ञप्तिमा लेखिएको छ, ‘तालिवानी विद्रोहीहरूको आक्रमण बढ्दै जाँदा अफगानिस्तान डरलाग्दो गृहयुद्धमा फस्ने खतरा बढ्दै गएको छ। यस अवस्थामा त्यहाँ रहेका नेपालीहरूको सुरक्षाबारे राप्रपा चिन्तित रहेको छ। त्यसर्थ, अफगानिस्तानमा रहेका नेपालीहरूलाई सुरक्षित तवरले स्वदेश फर्काउन तथा उनीहरूको पूर्ण सुरक्षाको व्यवस्था गर्न राप्रपा नेपाल सरकारसँग माग गर्दछ।’

राप्रपाले तत्कालीन नेपाल सरकार र ब्रिटिश सरकारबीच भएको सम्झौता अनुरूप बेलायती सेनामा रहेर नेपाली नागरिकहरूले काम गर्न थालेको २०० वर्ष नाघिसकेको र बेलायती सेनामा काम गर्ने नेपालीहरूमाथि कायम रहेको भेदभाव तथा असमानता पूर्णरूपमा अन्त्य हुन नसकेकोप्रति समेत ध्यानाकर्षण गराएको छ।

ब्रिटिश गोर्खाका भूतपूर्व सैनिकहरूको हाल जारी संघर्षप्रति ऐक्यबद्धता जनाउँदै उनीहरूका माग पूरा गर्न बेलायती सरकारसँग राप्रपाले आग्रह गरेको छ। सबै मागहरू पूरा गराउन सशक्त कुटनीतिक प्रयास निम्ति राप्रपाले सरकारको ध्यानाकर्षणसमेत गराएको छ।