राहदानी बनाउनेहरुको थेगिनसक्नु भिड

काठमाडौं । राहदानी बनाउनेको सङ्ख्या यो वर्षको अहिलेसम्मकै उच्च भएको छ । सामान्य अवस्थामा दैनिक एक हजार जनासम्मले राहदानी बनाउने गरेकामा हिजो आइतबार एकैदिन ५ हजार जनाले राहदानीका लागि टोकन पाएका विभागका प्रवक्ता सरद राज अरनले जानकारी दिए।

केही दिनयता लगातार राहदानी बनाउनेको भीड बढेको छ । हिजो राहदानी बनाउनका लागि ५ हजार जनाले टोकन लिए । अब टोकन नम्बरका आधारमा राहदानी वितरण गरिने छ । उनले भने। राहदानी विभागको अगाडि मानिसको भीड थेगिनसक्नु छ।

भीड थेगिसक्ने अवस्था नभएकाले भीड नियन्त्रणका लागि टोकनको व्यवस्था गरिएको भए पनि टोकन लिनकै लागि पनि भीड हुने गरेको छ । बिहानैदेखि राहदानी वितरण गर्ने व्यवस्था मिलाइएको छ । धेरै भीडका कारण बाटोमा हिँड्ने यात्रुलाई पनि समस्या पर्ने गरेको छ । अहिले अमेरिका जानका लागि खुलेको डाइभर्सिटी भिसा (ई–डीभी) खुलेका कारण पनि राहदानी बनाउनेको भीड बढेको उनले बताए । त्यो भिसा आवेदनका लागि गएको वर्षदेखि राहदानी नम्बर अनिवार्य गरिएको छ ।

विगतका वर्षमा नागरिकता नम्बर वा अन्य परिचयपत्रको नम्बरले काम गर्थ्यो तर अहिले राहदानी नम्बर नै अनिवार्य गरेकाले राहदानी पहिल्यै बनाउनुपर्ने बाध्यता आवेदकलाई परेको छ ।

गएको सेप्टेम्बर महिनासम्म तीन लाख ४९ हजार १ सय ७५ वटा राहदानी जारी भएका छन् । नेपालमा एमआरपी जारी हुन सुरु गरेयता अहिलेसम्म ६७ लाख ५९ हजार ९ सय ८३ थान राहदानी जारी भएका छन् ।

राहदानीको खपत बढे पनि अभाव भने नभएको उनको भनाइ छ।