एजेन्सी । भारतमा महिलाको विवाह गर्ने न्यूनतम उमेर हद बढाइने भएकाे छ। त्यहाँको मन्त्रिपरिषद्ले महिलाका लागि विवाहको न्यूनतम उमेर हद २१ वर्ष पुर्याउने निर्णय गरेको हो।
हाल भारतको कानुनमा विवाहका लागि महिलाका हकमा १८ वर्ष पुगेको भए पुग्ने व्यवस्था छ। पुरुषको विवाह गर्ने न्यूनतम उमेर भने २१ तोकिएको छ। अब महिलाको पनि विवाहयोग्य उमेर हद २१ बनाउने निर्णय भारत सररकारले गरेको हो।
अब कानुन संशोधन गरी उक्त नियम लागू हुने गरिने भारतीय सञ्चारमाध्यमले जनाएका छन्। तर यो प्रक्रिया पूरा गर्न केही समय लाग्ने बताइएको छ।
विवाहको उमेर हदबारे अहिलेको भारतीय कानुन सन् १९५५ मै बनाइएको हो। त्यसको झन्डै ६७ वर्षपछि पुरुष–महिला दुवैको विवाहयोग्य उमेर समान बनाउन लागिएको हो।
हाम्रो देशमा भने मुलुकी संहिता २०७४ जारी भएयता महिला र पुरुष दुवैका लागि विवाहयोग्य उमेर समान २० वर्ष नै तोकिएको छ। यसअघि भने विवाहका लागि न्यूनतम उमेर हद भारतमा जस्तै महिलालाई १८ र पुरुषलाई २० वर्ष तोकिएको थियो।
अन्य देशमा के छ व्यवस्था?
मुलुकपिच्छे विवाहयोग्य उमेर फरक फरक तोकिएका छन्। अमेरिकामा महिला–पुरुष दुवैका लागि १८, चीनमा पुरुषका लागि २२ र महिलाका लागि २०, जर्मनमा महिला र पुरुष दुवैका लागि १८, फ्रान्समा पनि १८, स्पेनमा १६ तथा बंगलादेशमा पुरुषका लागि २१ र महिलाका लागि १८ वर्ष विवाह-योग्य उमेर मानिएको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
