व्यापारी मृत्यु प्रकरण :सर्लाहीमा भरे साँझ ७ बजेसम्म निषेधाज्ञा

सर्लाही / सर्लाही प्रशासनले जारी गरेको निषेधाज्ञा आज (बुधबार) पनि कायमै छ । प्रहरी भ्यानको ठक्करबाट व्यापारीको ज्यान गएको विषयलाई प्रदर्शन भएपछि जिल्ला प्रशासन कार्यालयले हिजो ३ बजेदेखि आज साँझ ७ बजेसम्मलाई निषेधाज्ञा जारी गरेको छ । व्यापारीको मृत्यु भएपछि जिल्लामा तोडफोड र तनाव उत्पन्न भएको थियो ।

स्थिति नियन्त्रणमा लिन प्रशासनले केशरगन्ज सर्लाहीबाट पूर्व ईश्वरपुर नगरपालिका–४ सागरनाथ टोलसम्म र पश्चिममा ईश्वरपुर नगरपालिका–८ रामपुर टोलसम्म तथा इलाका प्रहरी कार्यालय, केशरगन्ज सर्लाहीबाट उत्तर ईश्वरपुर नगरपालिका–५ सखुवनी टोलसम्म र दक्षिणमा ईश्वरपुर नगरपालिका–९ खोरिया टोलसम्म निषेधाज्ञा जारी गरेको छ । 

आइतबार राति बयलवास इलाका प्रहरी कार्यालयको जिपले स्थानीय व्यापारी ३० वर्षीय रामकुमार महतोलाई ठक्कर दिँदा उनको मृत्यु भएको थियो । प्रहरीले महतोको मृत्यु गएपछि घटना लुकाउन खोजेको र मृत्यु नै शङ्कास्पद भएको भन्दै स्थानीय व्यापारीले टायर बालेर विरोध प्रदर्शन गरेका छन् । हिजो जिल्ला प्रशासन कार्यालयमा बसेको बैठकले निषेधाज्ञाको निर्णय गरेको थियो । 

‘दुर्घटनासम्बन्धी विषयलाई लिएर ईश्वरपुर नगरपालिका क्षेत्रमा भएको सार्वजनिक सम्पतिको तोडफोड, आगजनीलगायत गरिरहेको विरोध प्रदर्शनका कारण सर्वसधारणको सुरक्षामा पर्न सक्ने सम्भावित जोखिमलाई मध्यनजर गर्दै मङ्गलबार ३ बजेदेखि बुधबार साँझ ७ः०० बजेसम्म कुनै किसिमको भेला हुन, बाहिर हिँडडुल गर्न तथा राजनीतिक सभा तथा गतिविधि गर्न नपाउने निषेधाज्ञा आदेश जारी गरिएको छ,’ प्रशासनले जारी गरेको विज्ञप्तिमा उल्लेख छ ।