दिमाग खराब नगर्नुस्, यो गठबन्धन टुट्नेवाला छैन : माधव नेपाल

काठमाडौं । सत्तारुढ नेकपा (एकीकृत समाजवादी) का अध्यक्ष माधवकुमार नेपालले जनताको भावनालाई सम्मान गर्दै राष्ट्रको हितलाई केन्द्रमा राखेर अगाडि बढ्ने प्रतिबद्धता व्यक्त गरेका छन् । बुधबार प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहाल ‘प्रचण्ड’ सँग बालुवाटारमा छलफल गरेपछि नेपालले यस्तो बताएका हुन् ।

अनेरास्ववियुले काठमाडौंमा आयोजना गरेको रक्तदान कार्यक्रममा नेपालले गठबन्धन प्रदेश र प्रतिनिधिसभा चुनावसम्म नै जाने दाबी पनि दोहोर्‍याएका थिए । ‘गठबन्धनलाई बलियो बनाएर लैजानु पर्छ भन्ने प्रतिबद्धता व्यक्त गरेका छौं,’ प्रधानमन्त्री र दाहालसँग भएको छलफलबारे नेपालले भने, ‘जनताको भावनालाई पनि सम्मान गर्ने र नेपालको हितलाई केन्द्रबिन्दुमा राख्दै हामीले अगाडि बढ्ने सोच बनाएका छौं ।’

पूर्व प्रधानमन्त्री समेत रहेका नेपालले पाँच दलीय गठबन्धनबारे आएका समाचारका सम्बन्धमा पनि बालुवाटारमा छलफल भएको बताए । उनले बाहिर सार्वजनिक भएका समाचार तथ्यमा आधारित नरहेको पनि आरोप लगाए । ‘पाँचदलीय गठबन्धन गरिरहेका छौं । दिनदिनै पत्रिकामा समाचार पढेर कतिपयको दिमाग खराब हुने गरेको छ । दिमाग खराब गर्ने काम नगर्नुस्, यो गठबन्धन टुट्नेवाला छैन,’ उनले भने ।

एमसीसीलाई अगाडि बढाउन प्रधानमन्त्री देउवाले गठबन्धनका नेताहरूसँग छलफल गरिरहेका छन् । देउवा तत्काल एमसीसी संसद्बाट पारित गर्नुपर्ने पक्षमा छन् भने दाहाल र नेपालले यथास्थितिमा एमसीसीका पक्षमा संसद्मा मतदान गर्न नसकिने बताइरहेका छन् ।

संविधान र लोकतन्त्र जोगाउँदै संघीयताको रक्षा गर्न गठबन्धन बनेको बताउँदै नेपालले मुलुकलाई गलत दिशातिर लैजाने प्रयास रोकिएको बताए । एमालेले प्रतिनिधिसभामा जारी राखेको अवरोधप्रति पनि नेपालले आपत्ति जनाएका छन् ।

‘प्रतिनधिसभा क्रियाशील हुनुपर्ने, बनाउनुपर्नेमा जनताका, राष्ट्रका समस्याबारे छलफल गर्नुपर्नेमा बाधा व्यवधान खडा भइरहेको छ,’ उनले भने, ‘सबैतिर गञ्जागोल पैदा गरेर नेपालको राजनीतिलाई गलत दिशातिर लिएर जाने प्रवृत्ति केपी ओली नेतृत्वको एमालेले गरेको छ ।’ त्यो प्रवृत्तिको विरुद्धमा आफूहरू रहेको उनको भनाइ थियो ।