दशैं तिहार र छठलाई लक्षित गरि भैरहवा नाकाबाट खाद्यान्न लगायतका समानको आयात बढ्यो, एक अर्ब बढिको मात्रै लत्ता कपडा आयात ।

आयात बढ्यो

 

भैरहवा ।
रबिन्द्र गुप्ता ।
दशैं, तिहार र छठपर्वलाई लक्षित गर्दै व्यवसायीहरुले भारत तथा तेस्रो मुलुकबाट मालसामानको आयात बढाएका छन् । अन्य सिजनमा औद्योगिक कच्चापदार्थ धेरै भित्रिने भैरहवा भन्सारमा अहिले खाद्यान्न, फलफुल, लत्ताकपडा, मरमसला तथा सवारीसाधन लगायतको आयातमा वृद्धि भएको छ । 

भैरहवा स्थित बेलहिया नाकाबाट चाडपर्वका लागि भनेर खाद्यान्न, फलफुल, लत्ताकपडा, मरमसला तथा सवारीसाधन लगायतको आयातमा वृद्धि भएको छ । यस नाकाबाट मात्रै दशैं, तिहारका लागि एक अर्ब भन्दा बढीको लत्ताकपडा आयात हुने गरेको छ ।
भैरहवाबाट साउनमा ३० करोड ७४ लाखको सुर्ती तथा तयारी कपडा आयात भएको थियो । भने,भदौ र असोज (दुई महिनामा) ३५–४० करोडको लत्ताकपडा आयात हुने भन्सार कार्यालयको भनाइ छ ।

दशैंकै लागि भैरहवा नाकाबाट फलफूल भित्रिने क्रम पनि बढ्दो छ । स्याउ, काँचो केरा, भुइकटहर, अनार यो नाकाबाट धेरै भित्रिन्छ । दैनिक ५०–७५ गाडी फलफूल भित्रिने यो नाकाबाट असोज लागेसंगै दैनिक एक सय भन्दा बढी फलफूलका गाडी नेपाल भित्रिरहेकोे छ । चाडपर्वकै लागि अहिले खाद्यान्नको आयात पनि तुलनात्मक रुपमा बढेको छ । नाकाबाट वार्षिक साढे २३ अर्ब बराबरको सवारीसाधन आयात हुने गरेको भन्सार कार्यालयले जनाएको छ । आयातको भण्डै ४० प्रतिशत कारोबार दशैंतिहारको समयमा हुने भएकाले यो समयमा गाडीको माग अत्याधिक रहेको जगत मोर्टस प्रा.लि. भैरहवाको भनाइ छ ।

दशंै, तिहार र छठपर्व लक्षित बजारका लागि भैरहवा नाकाबाट पाँच अर्ब भन्दा बढीका जिप, कार, भ्यान र मोटरसाइकल आयात हुन्छन् । दशैंमा बुटवल, भैरहवा जस्ता ठूला शहरमा चारपांग्रे गाडीको विक्री ह्वात्तै बढेको छ । दशैंमा देवी देउताका मुर्ती, इलेक्ट्रोनिक सामान टिभी, क्यामेरा, झालर लाइट, मोबाइल जस्ता सामानको विक्री उल्लेखनीय बढ्ने गर्दछ ।