काठमाडौं । अमेरिकी सहयोग परियोजना एमसिसीका विषयमा छलफल गर्न प्रधानमन्त्रीको सरकारी निवास बालुवाटारमा शीर्ष नेताहरूबीच बैठक सुरु भएको छ।
बैठकमा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र प्रमुख प्रतिपक्षी नेकपा एमालेका अध्यक्ष केपी शर्मा ओली, सरकारका प्रवक्तासमेत रहेका सञ्चार तथा सूचना प्रविधिमन्त्री ज्ञानेन्द्र कार्की, एमाले महासचिव शंकर पोखरेल पनि सहभागी रहेको प्रधानमन्त्रीको सचिवालयले जनाएको छ।
त्यसअघि आइतबार बिहान देउवा र प्रचण्डबीच बालुवाटारमा भेटवार्ता भएको थियो। देउवा र प्रचण्डबीचको भेटवार्तामा एमसिसीबारे छलफल भएको थियो।
प्रचण्डसँगको छलफलमा प्रधानमन्त्री देउवाले आगामी माघ २६ गते बुधबार बस्ने प्रतिनिधिसभा बैठकमा एमसिसी टेबल गर्न जोड दिएका थिए। देउवासँगको छलफलमा प्रचण्डले प्रमुख प्रतिपक्षसँग पनि छलफल गरेर अघि बढ्दा उपयुक्त हुने धारणा राखेपछि देउवाले तत्काल ओलीलाई फोन गरेर बालुवाटारमा छलफलका लागि बोलाएका थिए।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
