झापा । पूर्व–पश्चिम लोकमार्गअन्तर्गत झापाको कमल गाउँपालिका–४ स्थित रिजाल पेट्रोल पम्पनजिक जिपको ठक्करबाट बिहीबार दिउँसो स्कुटर चालकको मृत्यु भएको छ ।
प्रहरीका अनुसार पश्चिमतर्फ आउँदै गरेको मे ६ प २७१८ नम्बरको स्कुटरलाई पूर्वतर्फ जाँदै गरेको मे ६ च ११६७ नम्बरको जिपले ठक्कर दिँदा दुर्घटना भएको हो । दुर्घटनामा परेर गम्भीर घाइते भएका स्कुटर चालक शिवसताक्षी नगरपालिका–८ का ४१ वर्षीय नरबहादुर गहतराजको मृत्यु भएको प्रदेश १ ट्राफिक प्रहरी कार्यालय इटहरीले जनाएको छ ।
प्रहरीका अनुसार दुर्घटनामा गम्भीर घाइते भएका उनको उपचारका क्रममा दमकको लाइफलाइन अस्पतालमा दिउँसो ४ बजेतिर मृत्यु भएको हो । जिप र चालक मोरङको रङ्गेली नगरपालिका–२ का २१ वर्षीय दीपक अधिकारीलाई नियन्त्रणमा लिएर घटनाको अनुसन्धान थालिएको प्रहरीले जनाएको छ ।
प्रहरीका अनुसार जिपले अर्को सवारीसाधनलाई ओभरटेक गर्ने क्रममा दुर्घटना भएको प्रारम्भिक अनुसन्धानबाट खुलेको छ ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
