सेटिङ नमिलेपछि इटहरीमा राजस्व हाकिमलाइ तस्करकाे हातपात , प्रहरी भन्छ घटनाबारे केहि थाहा छैन

इटहरी ।  राजस्व अनुसन्धान कार्यालय इटहरीका प्रमुख तिर्थराज खनालमाथि तस्करीको लाइन चलाउने सन्तोष यादवले हातपात गरेका छन् । कार्यालय प्रमुख खनालको कार्यकक्षमा मंगलबार विहान ९ बजे यादवले हातपात गरेका हुन् ।

खाद्यवस्तु, चिनी र सूर्ती भारतदेखि तस्करी गरि नेपाल ल्याउने यादवले सशस्त्र प्रहरीका सही गणेश खड्काको सामुन्ने कार्यालय प्रमुख खनाललाई हातपात गरेका हुन् । खड्का सशस्त्र प्रहरी बल सुनसरीबाट सादा पोशकमा खटिने प्रहरी हुन् ।

खड्का १ नम्बर बराह बहिनी मुख्यलाय पकली सुनसरीमा कार्यरत छन् । उनी सशस्त्र प्रहरी प्रदेश १ नं. का डिआइजी कमल गिरीका सादा पोशकका ‘घुमुवा’ प्रहरी रहेको बुझिएको छ ।

खड्काको योजनामा आफूमाथि हातपात भएको अनुसन्धान कार्यालय प्रमुख खनालले बताए । अहिले सुनसरीमा सशस्त्र प्रहरीको मिलेमतोमा सीमा क्षेत्रमा खुलेआम तस्करी भइरहेको स्थानीयले बताएका छन् । सई खड्कासहित तस्करीका नाइके यादव राजश्व अनुसन्धानका प्रमुख खनालसँग रकमको ‘डिल’ गर्न कार्यालय पुगेका थिए ।

भारतदेखि नेपालतिर हुने अवैध चोरी तस्करीमा निगरानी बढाएपछि क्यारिङमार्फत तस्करी गर्ने यादवले सशस्त्र प्रहरीका सई खड्काको आडमा आफूमाथि हातपात गरेको खनालले बताए । ‘मलाई तस्करीवापत घुस दिन आएका रहेछन्’ उनले भने, ‘त्यसलाई अस्वीकार गरेपछि उनी ममाथि जाईलागे ।’ आक्रमणको बेला सशस्त्रका सई यादव रमिते बनेको खनालले बताए ।

घटनापछि दुबै जना फरार भएको र त्यसबारे सशस्त्र प्रहरीलाई जानकारी दिएको कार्यालय प्रमुख खनालले बताएका छन् । यादवको आक्रमणबाट आफ्नो हातको बुढी औंलाको जोइन्टमा क्षति पुगेको उनले बताए ।

अहिले सुनसरीको घुक्सी, श्रीपुर, लौकही, साहेबगञ्ज, अमडुवा, कप्तानगञ्ज नाकाबाट तस्करी हँुँदै आएको छ । सोही नाकादेखि हुँदै आएको चोरी तस्करी रोक्न खोज्दा कार्यालय प्रमुख खनालसँग ‘लाईन’ मिलाउन सशस्त्र प्रहरीको आडमा यादव आएका हुन् ।

सशस्त्र प्रहरी प्रदेश १ नं. का डिआइजी कमल गिरी घटनाको विषयमा आफूलाई केही जानकारी नभएको बताए । ‘सई खड्का ४ नम्बर गणमा कार्यरत छन्,’ उनले भने, ‘कार्यालय प्रमुखमाथि हातपात भएको विषयमा आफूलाई केही जानकारी छैन ।’