प्रचण्ड-माधव एमसीसीबारे भ्रमको जालोमा फसे : रामचन्द्र पौडेल

बारा । सत्तारूढ दल नेपाली काँग्रेसका वरिष्ठ नेता रामचन्द्र पौडेलले नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ र नेकपा (एकीकृत समाजवादी) का अध्यक्ष माधवकुमार नेपाल एमसीसीको विषयमा भ्रमको जालोमा फसेको बताएका छन् ।

बाराको सिमरामा आयोजित साक्षात्कारमा बोल्दै नेता पौडेलले एमसीसीको विषयमा देश र जनतालाई धोका दिने गरी कसैले पनि ‘डबल-स्ट्याण्ड’ को भूमिका खेल्न नहुने उनले बताए । उनले भने, ‘प्रचण्ड र माधव नेपाल एमसीसीलाई लिएर भ्रमको जालोमा फसेका छन् । कम्युनिष्टका नेताहरु जेलिएका छन् । उहाँहरु प्रचारको जालोमा जेलिनु भयो । एमसीसीको शुरुवात स्वयम् झलनाथजीबाट भएको हो । यो एमसीसी सम्झौता सत्तामा पुगेका कुनै पनि कम्युनिष्ट नेता यो सम्झौताबाट अलग छैनन् । उहाँहरु सबै संलग्न हुनुहुन्छ । सबै नेता पालैपालो संलग्न हुनुहुन्छ ।’

उनले भपे, ‘केपी ओली प्रधानमन्त्री बनेपछि संसदबाट पारित गर्नुपर्छ भन्ने बनाउनु भयो । अमेरिकाको यो संसदबाट पास गर्नुपर्छ भन्ने कुनै दबाब थिएन । यसलाई संसदमा लैजान्छु भनेर उहाँले त्यसो गर्नुभयो । अहिले एमाले त्यो अनुमोदन गर्नबाट पछि हट्न मिल्छ ? एमसीसी हुन्न भन्ने कुरा यो देश र सारा दुनियाँलाई धोका हो कि होइन ? यसको परिणाम के हुन्छ ? नेपालको राजनीतिक अवस्था र अर्थतन्त्र कहाँ पुग्छ ? आज दातृ निकायहरुलाई हामीविरुद्ध पुर्‍याउने काम पनि हुन्छ, म समाजवादी हो । म नेपालवादी हो । यस्तो किसिमको फट्याँई मलाई मन पर्दैन । डबल स्ट्याण्ड कसैले पनि नगरौं ।’

उनले अब देशको विकास गर्नेगरी सबै दल जिम्मेवार रुपमा प्रस्तुत हुनुपर्ने बताए । उच्चस्तरीय राजनीतिक समन्वय समितिका संयोजक समेत रहेका नेता पौडेलले प्रचण्ड र माधव नेपाल एमसीसीबारे भ्रमको जालोमा फसेको जिकिर गरे । उनले भने, ‘शुरुमा एमसीसी ल्याउनमा प्रचण्ड र माधव नेपाल आफै लाग्नुभयो । पछि क-कसले कुन-कुन सूत्रबाट यसको विरुद्धमा जानुपर्छ भन्ने कुरा आयो, त्यो कुरा आएपछि उहाँहरुले आफ्नो तर्कशक्ति एमसीसी खराब हो भन्नेमा खर्च गर्नुभयो । उहाँहरु अहिले माकुरा आफ्नो जालोमा फसे जस्तो फस्नु भयो । उहाँहरु आँफैले फैलाएको झुटो अफवाहको जालोमा आफै अल्झिनु भएको छ । मैले त जानेको कुरा यत्ति हो ।’

उनले आफू त सबैसँग सहकार्य गरेर जाने व्यक्ति भएको पनि उल्लेख गरे । उनले आफ्नै पार्टीभित्र पनि एमसीसीबारे जनतालाई बुझाउनुको लागि पर्याप्त भूमिका नखेलिएको गुनासो पोखे ।