एमसीसीको विरोधमा गठबन्धनका भ्रातृ संगठनको प्रदर्शन, बानेश्वर अस्तव्यस्त

काठमाडौं । सत्तारुढ माओवादी केन्द्र र नेकपा एकीकृत समाजवादी पार्टीका भातृ संगठनले बानेश्वरमा प्रदर्शन गरिरहेका छन् ।नाराबाजीसहित माओवादी निकट अखिल क्रान्तिकारी र नेकपा एस निकट युवा संघले नाराबाजी गर्दै एमसीसीविरुद्ध प्रदर्शन गरिरहेका छन् ।

यस्तै, नेकपा एस निकट युवा संघले ’एमसीसी चाहिँदैन, देश बेच्न पाइँदैन’ भन्दै नाराबाजी गरेर टायर बालेर प्रदर्शन गरेका छन् । अमेरिकी सहयोग परियोजना (एमसीसी) विरुद्धको सडक प्रदर्शनले काठमाडौंको नयाँ बानेश्वर क्षेत्रमा यातायात व्यवस्था अस्तव्यस्त बनेको छ । विभिन्न दलहरूले एमसीसीविरुद्ध प्रदर्शन गर्दा यातायात अस्तव्यस्त भएको महानगरीय ट्राफिक प्रहरी महाशाखाले जानकारी दिएको छ । महाशाखाका प्रवक्ता सञ्जीव शर्मा दासले सडक प्रदर्शनका कारण यातायात अस्तव्यस्त बनेको बताए । बानेश्वर क्षेत्रमा यातायात अस्तव्यस्त बनेको छ । व्यवस्थापन गरिरहेका छौं’, उनले भने, ‘माइतीघर-नयाँ बानेश्वर, नयाँ बानेश्वर-कोटेश्वर, गौशाला क्षेत्रमा यातायात प्रभावित छ ।’ सडकमा टायर समेत बालेर प्रदर्शन गरिएको छ । प्रदर्शनकारीले एमसीसीविरुद्ध चर्को नाराबाजी गरिरहेका छन् ।

मोहन वैद्य ‘किरण’ नेतृत्वको नेपाल कम्युनिस्ट पार्टी (क्रान्तिकारी माओवादी), नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी, मोहनविक्रम सिंह नेतृत्वको नेपाल कम्युनिस्ट पार्टी (मसाल) लगायत दल र मोर्चाले संयुक्त रूपमा प्रदर्शन गरिरहेका हुन् ।