सिङ्गापुरका प्रधानमन्त्रीले ‘भारतका आधा सांसद आपराधिक पृष्ठभूमिका’ भनेपछि…

काठमाडौं । भारतले आफ्ना सांसदहरूमाथि सिङ्गापुरका प्रधानमन्त्रीले गरेको टिप्पणीप्रति आपत्ति जनाएको छ । सिङ्गापुरको संसदीय मर्यादासम्बन्धी भएको बहसका क्रममा बुधबार प्रधानमन्त्री ली सिएन लुङले भारतको लोकसभाका झण्डै आधा सदस्यहरूले फौजदारी अभियोग सामना गरेको भनी टिप्पणी गरेका थिए ।

यसले दुई देशबीचको सम्बन्धमा दरार आएको छ । भारतको परराष्ट्र मन्त्रालयले सिङ्गापुरका राजदूत (हाइ कमिसनर) लाई बोलाएर आपत्ति जनाएको हो । संसदीय मापदण्डको उल्लेख गर्दै लीले सन् १९४७ मा बेलायतबाट स्वतन्त्र भएपछि पहिलो प्रधानमन्त्री जवाहरलाल नेहरु सत्तामा आएदेखि त्यहाँ गिरावट आएको उल्लेख गरेका थिए । नेहरुको प्रंसशा गरेका उनले भारतीय सांसदको बारेमा टिप्पणी गरे ।

‘नेहरुको भारत यस्तो भएको छ जहाँ मिडिया रिपोर्टहरू अनुसार लोकसभाका झण्डै आधा सांसदहरूमाथि बलात्कार र हत्याको आरोपसहित आपराधिक मुद्दा विचाराधीन छन्’, लीले भारतको संसदको तल्लो सदनलाई उल्लेख गर्दै भने । यद्यपि, यसमध्ये धेरै आरोपहरू राजनीतिक रूपमा प्रेरित रहेको उनको भनाइ थियो ।

भारतीय विदेश मन्त्रालयले प्रतिक्रिया दिन अस्वीकार गरेको तर त्यहाँका एक अधिकारीले सिंगापुरे नेताले भनेको कुराको आलोचना गरेको रोयटर्सले जनाएको छ । ‘सिङ्गापुरका प्रधानमन्त्रीको भनाइ अनावश्यक थियो’, पहिचान खुलाउन अस्वीकार गर्ने ती अधिकारीले भने । ‘हामीले यो मुद्दा सिंगापुर पक्षसँग उठाएका छौँ ।’

लीको कार्यालयले यसमा थप गर्नुपर्ने केही नभएको बताएको छ । भारत र सिङ्गापुर दुवै पूर्व बेलायती उपनिवेश हुन् र दशकौंदेखि घनिष्ठ सहयोगी रहेका छन् ।