नेकपा एसलाइ लक्षित गर्दै बास्काेटाले भने ,जस्केलाबाट जन्मेको एउटा नक्कली पार्टीको चुरिफुरी अब सकियाे

काठमाडौं । प्रमुख प्रतिपक्षी दल नेकपा एमालेका नेता गोकुल बाँस्कोटाले एमसीसी प्रकरणमा नेकपा एकीकृत समाजवादीको ‘फाइँफुइँ’ आज (आइतबार) बाट सकिने भन्दै व्यंग्य गरेका छन् ।

आज प्रतिनिधि सभाको बैठकमा एमसीसी सम्झौता टेबल गर्न दिन एकीकृत समाजवादी सहमत भएको छ । हिजो शनिबार बसेको उसको स्थायी कमिटी बैठकले जस्ताको तस्तै एमसीसी पारितमा आफ्नो सहमति नरहे पनि छलफलका लागि यो संसदमा पेस गर्न भने अवरोध नगर्ने निणर्य गरेको हो ।

यसैगरी नेकपा माओवादी केन्द्र पनि एमसीसी टेबल गर्न सहमत भएको बताइएको छ । तर यसको अन्तिम छिनोफानो गर्न आज बिहान सत्ता गठबन्धनका दलहरूको बैठक बालुवाटारमा बस्दै छ । साथै एमसीसी सम्झौता संसदमा पेस हुँदा मन्त्रीहरूले पक्षमै मत दिनुपर्ने तर त्यही पार्टीका अन्य सांसदले बहिष्कार गर्न पाउने सहमति भएको खबर पनि सार्वजनिक भएको छ ।

यसैलाई कटाक्ष गर्दै पूर्व सञ्चारमन्त्री समेत रहेका एमाले नेता बाँस्कोटाले नाम नलिईकन एकीकृत समाजवादीलाई ‘जस्केलाबाट आएको नक्कली पार्टी’को उपमा दिँदै यसको ‘फाइँफुइँ’ आजबाट समाप्त हुने टिप्पणी गरेका हुन् । एकीकृत समाजवादीले एमसीसीविरुद्ध देशव्यापी विरोध प्रदर्शन गरेको थियो । ‘जस्केलाबाट जन्मेको एउटा नक्कली पार्टीको फाइँफुइँ पनि आजबाट धुलीसात् हुने भएछ’, बाँस्कोटाले आइतबार बिहानै सामाजिक सञ्जालमार्फत कटाक्ष गरेका छन्, ‘मन्त्रीहरूले भोट हाल्ने, नेताहरूले बहिष्कार गर्ने । समाजवादी कायदा !’