काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले एमसीसी अनुमोदन प्रस्ताव स्थगन गर्न माग गरेका छन् । प्रतिनिधिसभा बैठकमा एमसीसीमाथिको छलफलमा भाग लिदै अध्यक्ष लिङदेनले जनता आश्वस्त नभएसम्मका लागि एमसीसीलाई स्थगन गर्नुपर्ने बताएका हुन् ।
‘यो केबल आर्थिक सहायताको विषयमात्रै होइन । नेपाली जनता यस विषयमा विभाजित भएकोले यसलाई स्थगन गरेर नयाँ ढंगले जान सरकारसँग प्रस्ताव गर्छु’, लिङदेनले भने । उनले एमसीसीलाई संसदको प्राविधिक प्रक्रियामात्रै पुर्याएर पारित गर्ने हतारो गर्न नहुनेमा जोड दिए ।
‘यथास्थितिमा यसलाई पारित गर्नु भनेको देशलाई अझ द्वन्द्वमा लैजाने विषय हो । संसदका सबै निर्णय ठीक हुन्छ भन्ने हुँदैन । त्यसैले यस विषयमा सबै राजनीतिक दलहरु गम्भीर बन्नुपर्छ’, उनले भने ।
‘एमसिसीको दफादफामा छलफल हुनुपर्छ, यसको एकएक दफाबारे जनताले बुझ्नुपर्छ,’ उनले भने। एमसिसीजस्तो सम्झौतालाई अन्तर्राष्ट्रिय सन्धिको मान्यता किन दिनुपर्ने भन्दै उनले प्रश्न गरे। वैदेशिक सम्बन्ध केटाकेटी ढंगले अगाडि नबढ्न उनले सबैसँग अपिल पनि गरे।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
