नेपाल बारको निर्वाचनमा स्वतन्त्र कानुन व्यवसायीहरुको पनि छुट्टै प्यानल

काठमाडौं । नेपाल बार एसोसिएसनको चैत १९ मा हुन गैरहेको केन्द्रीय कार्य समितिको निर्वाचनमा राष्ट्रिय स्वतन्त्र कानुन व्यवसायीहरुको संगठन एनएलए ले अधिवक्ता पृथ्वी नाथ राईको अध्यक्षतामा प्यानलै दर्ता गरेको छ । नेपाल बारको चुनावी इतिहासमा स्वतन्त्र कानुन व्यवसायीहरुले प्यानलनै बनाएर उम्मेदवारी दिएको सम्भवत यो पहिलो पटक हो।

उम्मेदवारी दर्ता पछि राजनीतिक दलहरुको एनएलएले, राजनीतिक दलहरुको चाकडीलाइ आफ्नो पहिलो प्राथमिकतामा राखेर न्यायालयलाई बेच्न पनि पछाडी नपरेका दल सम्बद्ध प्यानलहरुको सिण्डीकेटलाई तोड्न र न्यायलय र नेपाल बारको सुद्धिकरणकै लागि नेतृत्व गर्न संगठित भएर उम्मेदवारी दिएको बताएको छ।

विगतमा स्वतन्त्र उम्मेदवारहरुहरुले बारको निर्वाचनमा सहभागिता जनाए पनि, संगठित भएर प्यानल सहित उम्मेदवारी दिएका थिएनन्। उम्मेदवारी दर्ता पछि संचारकर्मीहरु सँग कुरा गर्दै एनएलए बाट महासचिवका उम्मेदवार अधिवक्ता त्रिलोक बहादुर चन्दले, स्वन्तन्त्र न्यायपालिकाको मुद्दालाई बोकेर हिड्ने तर आँफै राजनीतिक दलको स्वार्थ पूर्तिको लागि मरिमेट्ने र न्यायालयलाई राजनीतिक भागबन्डाको अखडा बनाउने दलका दलालहरुको काउन्टरमा आफु उभिएको बताएका हुन् ।

सेतोपट्टि लगाएर न्यायालय सुद्दिकरणको आन्दोलनको नेतृत्व गरेको समूह हो एनएलए। नेपाल बारले अदालत ठप्प पारेर प्रधान न्यायाधिश विरुद्ध आन्दोलन गर्दैगर्दा सेतो पट्टि समूहले त्यसको कडा बिरोध गरेको थियो। न्यायलय सुद्दिकरण को मुद्दा साझा भएपनि जनताको न्याय पाउने अधिकारलाई हनन् गरेर हुने कुनै पनि आन्दोलन आफुहरुलाई स्वीकार्य नहुने सेतो पट्टि समूहले स्पष्ट पारेको छ।