रुसले युक्रेनमा हमला गरेको एक महिना पूरा, युद्ध अझै लम्बिने संकेत

रुसले छिमेकी देश युक्रेनमाथि सैन्य आक्रमण सुरू गरेको एक महिना पूरा भएको छ । गत फेब्रुअरी २४ तारिखमा रुसी सेना युक्रेनी सिमानाभित्र छिरेर आक्रमण सुरू गरेका थिए । रुसको तुलनामा निकै कमजोर ठानिएको युक्रेनमाथिको आक्रमण एक महिना बित्दा रुसका लागि महंगो पर्ने देखिएको छ ।

 रुसले युक्रेनमा हमला गरेको एक महिना बितिसक्दा युद्ध अन्त्य हुने कुनै संकेत छैन । बरु पश्चिमा देशहरुको सहयोगमा युक्रेन झन कठोर रुपमा लडिरहन प्रतिवद्ध देखिएको छ । एक महिनाको रुसी आक्रमणमा करीब ३५ लाख युक्रेनीहरु देश छाडेर युरोपमा शरणार्थी बन्न पुगेका छन् भने देशभित्रै विस्थापित हुने संख्या ६५ लाख नाघेको छ । आक्रमणबाट युक्रेनमा ठूलो क्षति पुगेको छ । थुप्रै युक्रेनी शहरहरु भग्नावशेषमा परिणत भएका छन् । विशेष गरी दक्षिणी शहर मारिउपलमा सवैभन्दा ठूलो क्षति पुगेको छ । युक्रेन भित्रका लगभग सवै आणविक भट्टीहरु रुसी सैनिकको कब्जामा पुगेका छन् ।

रुसी सेनाको ठूलो संख्या राजधानी किएभ नजिकै अड्डा जमाएर बसेको छ । तर युक्रेनी शैनिकले रुसी सेनालाई कीभ कब्जामा लिन दिएका छैनन् । त्यसो त खर्सोन शहर बाहेक अन्य शहर रुसी कब्जामा गएका छैनन् । युक्रेनी शैनीकले आफ्नो बलबुताले भ्याएसम्म रुषको सामना गरिरहेकै छ । युद्धमा युक्रेनका सयौं सैनिक मारिएका छन् भने हताहत हुने सर्वसाधारणको संख्या पनि उल्लेख्य छ ।

रुसी सेनातर्फ पनि उल्लेख्य क्षति पुगेको अनुमान गरिएको छ । यहिबेला युक्रेनका राष्ट्रपति जेलेन्स्कीले संसारभरिका मानिसलाई बिहीवार सडकमा उत्रिएर युक्रेनप्रति समर्थन जनाउन अपिल गरेका छन् । रुसको निर्मम र मुढे बललाई संसारले रोक्नुपर्ने भन्दै राष्ट्रपति जेलेन्स्कीले सबै युक्रेनी जनताको अनि यस धरतीका सबै स्वतन्त्र मानिसको मुटु चुँडिएकाले सबै देशका नागरिकलाई सडकमा उत्रन अपिल गरेका हुन् ।

उसो त अमेरिकासहित नाटो गठबन्धनका देशहरुले युक्रेनमा देखिने गरी सैनिक नपठाए पनि उनीहरुले गर्न सक्ने जति सहयोग गरिरहेका छन् । हातहतियारदेखि भाडाका सैनिक समेत उनीहरुले पठाईरहेका छन् भन्ने विश्लेषण गरिंदै छ । तर युद्ध अन्त्य हुने छाँट नदेखिईरहँदा रुसले युक्रेनमा के चाहेको छ भन्ने पनि उत्तिकै अन्योलको विषय बनेको छ । युद्ध कहिले र कसरी अन्त्य हुन्छ भन्ने अनुमान गर्न मुस्किल हुन थालेको छ ।