निर्वाचनमा जाने नीति पास गर्न विप्लवलाई कठिन

काठमाडौं । स्थानीय तहको निर्वाचन लड्नुपर्ने पार्टी नीति बनाउन चाहेका नेपाल कम्युनिस्ट पार्टी (नेकपा) का महासचिव नेत्रविक्रम चन्द विप्लव अप्ठ्यारोमा परेका छन् । केन्द्रीय समिति बैठकमा विप्लवले पेस गरेको राजनीतिक प्रस्तावमा केन्द्रीय सदस्य विभाजित देखिएका छन् । यथास्थितिमा निर्वाचनमा भाग लिन नहुने बहुमत सदस्यको मत छ ।

गत शुक्रबारदेखि कपिलवस्तुको शिवगढीमा जारी बैठकमा बिहीबार राजनीतिक प्रतिवेदनमाथि धारणा राख्ने क्रम सकिएको सचिवालय सदस्य हेमन्तप्रकाश ओलीले जानकारी दिए । ‘बैठकमा उठेका विषयबारे महासचिवले आज शुक्रबार आफ्नो मन्तव्य राख्ने कार्यक्रम छ । त्यसपछि पुनः सचिवालय बस्नेछ,’ उनले भने । विप्लवले स्थानीय निर्वाचनलाई उपयोग गर्ने, अमेरिकी सहयोग परियोजना एसिसी र पार्टीको महाधिवेशनलाई समेटेर प्रस्ताव पेस गरेका थिए । एमसिसीको विरोधमा देशव्यापी मोर्चा बनाएर जानुपर्ने धारणा धेरैको छ । महाधिवेशन छिटो गर्नुपर्नेमा उनीहरूको जोड छ ।
बैठकमा ६८ जना केन्द्रीय सदस्यसहित, चारजना सचिवालय सदस्य र चारजना सल्लाहकारले राजनीतिक प्रतिवेदनमाथि धारणा राखेका छन् । सचिवालयका सदस्यहरूले बैठकको सुरुवातमै आफ्नो धारणा राखेका थिए । सचिवालयका खड्गबहादुर विश्वकर्मा र सन्तोष बुढामगरले निर्वाचनमा सहभागी हुनुपर्ने विप्लवको प्रस्तावमा समर्थन जनाएका छन् भने हेमन्तप्रकाश वली र धर्मेन्द्र बाँस्तोल बहिष्कारको लाइनमा छन् ।

६८ जना केन्द्रीय सदस्य, सचिवालयका चारजना र चारजना सल्लाहकारमध्ये महासचिव विप्लवले पेस गरेको राजनीतिक प्रस्तावको विपक्षमा ४० जनाले धारणा राखेका छन् भने २८ जनाले उनको प्रस्तावमा समर्थन गरेका छन् । आठजनाले भने पार्टीलाई मिलाएर लैजानुपर्ने धारणा राखेका छन् ।

सल्लाहकार समितिका तीनजनाले पनि निर्वाचनमा सहभागी हुन नहुने धारणा राखेको जनाइएको छ । सल्लाहकार समितिमा असारे काका, चित्रबहादुर आले, दीर्घ पाण्डे, शंकर खड्का र हेम खतिवडा निर्वाचनमा जान नहुने पक्षमा छन् । बैठकमा केन्द्रीय सदस्य वसन्त श्रेष्ठले निर्वाचनमा सहभागी भएर क्रान्तिको झन्डा बोकिरहने ग्यारेन्टी के छ ? भन्दै प्रश्न गरेको श्रोतको भनाई छ । निर्वाचनलाई उपयोग गर्ने भन्दै निर्वाचनमा गएका पार्टीहरू त्यहीँ भुलेका छन् । हामी त्यहाँबाट उम्किएर फर्किन्छौँ भन्ने ग्यारेन्टी के छ ? भन्ने प्रश्न उठेको छ ।’ बैठकमा नेतृत्व केन्द्रीकरणको विषयमा समेत प्रश्न उठेको छ । बैठकमा धर्मेन्द्र बास्तोला र हेमन्तप्रकाश ओलीले केन्द्रीकरण गर्दा पार्टीमा जनवादको गलत अभ्यास हुन लागेको भन्दै प्रश्न गरेका थिए ।