कमल थापा नेर्तत्वको राप्रपा नेपालको घोषणापत्र सार्वजनिक

काठमाडौं । कमला थापाले पुनर्गठन गरेको राष्ट्रिय प्रजातन्त्र पार्टी नेपालले स्थानीय निर्वाचन केन्द्रित घोषणापत्र सार्वजनिक गरेको छ।

तीर चिन्ह लिएर निर्वाचनमा गएको यस पार्टीले स्थानीय निर्वाचनका लागि मुख्य तीन क्षेत्रहरुलाई प्राथमिकतामा राखी घोषणापत्रमा सार्वजनिक गरेको हो।

मूल कार्यक्रम, जनता केन्द्रित बिशेष कार्यक्रम र क्षेत्रगत विकास नीति तथा कार्यक्रम गरी तीन पक्षलाई घोषणा पत्रले समेटेको छ। मूल कार्यक्रम अन्तर्गत राष्ट्रियता, सनातन धर्म, सुशासन, अर्थतन्त्रको विकास, पूँजी निर्माण र गरिबी न्यूनीकरण जस्ता विषयहरु समेटिएका छन्। यी कार्यक्रम अन्तर्गत पृथ्वीनारायण शाहको तस्वीर गाउँ तथा नगरपालिकामा अनिवार्य रुपमा राख्ने ब्यवस्था गर्ने, गौहत्या पूर्णरुपमा बन्द गर्ने र स्थानीय तहमा गौशालाहरू निर्माण गर्ने जस्ता विषयहरु उल्लेख गरिएका छन्।

त्यस्तै स्थानीय तहलाई भ्रष्टाचारमुक्त बनाउने, सूचनाको पहुँच बढाउने र आर्थिक विकास गर्ने जस्ता विषयहरु पनि छन्। साथै १० बर्षभित्र गरिबी न्यूनीकरण गरिसक्ने जस्ता प्रतिबद्धताहरू पनि समेटिएका छन्।

जनता केन्द्रित विशेष कार्यक्रम अन्तर्गत बिजुली बत्तीको महशुलमा ५० प्रतिशत छुट दिइने, ‘एक परिवार, एक रोजगार’ कार्यक्रम, र ‘एक गाउँ“, एक उत्पादन’ अभियान जस्ता कार्यक्रम सञ्चालन गरिने जनाइएको छ।

क्षेत्रगत विकास नीति तथा कार्यक्रम अन्तर्गत निजी क्षेत्रलाई प्रोत्साहन गर्ने, महिला सशक्तीकरणलाई प्राथमिकतामा राख्ने, तराई मधेसको समुत्थान गर्ने जस्ता विषयहरु समेटिएका छन्।

त्यस्तै आदिवासी, जनजाति, उत्पीडित, मुस्लिम समुदाय तथा दुर्गम क्षेत्रको उत्थान गर्ने, बालबालिका तथा युवा लक्षित विकास कार्यक्रम ल्याउने र भाषा, साहित्य, कला, संस्कृति, खेलकूद तथा चलचित्र लगायतका क्षेत्रमा योजनाबद्ध कार्यक्रम ल्याइने घोषणापत्रमा उल्लेख छ।