सुदूरपश्चिममा १५ जना जनप्रतिनिधि निर्विरोध (सूचीसहित)

धनगढी । सुदूरपश्चिम प्रदेशमा १५ जना जनप्रतिनिधि निर्विरोध निर्वाचित भएका छन्। निर्वाचन आयोगले सार्वजनिक गरेको विवरणअनुसार विभिन्न जिल्लामा दलित महिला सदस्यको कोटामा १२ र महिला सदस्यको कोटामा तीन जना निर्विरोध निर्वाचित भएका हुन्। एमालेका ७, काङ्ग्रेसका ४, माओवादी केन्द्रका २, एकीकृत समाजवादी र स्वतन्त्रबाट एकरएक जना निर्विरोध भएका हुन्।

जसमा बाजुराको बुढीनन्दा नगरपालिका-४ मा दलित महिला सदस्य कोटामा एमालेबाट उम्मेद्वार बनेकी २६ वर्षीया बसन्ती चदारा, वडा नम्बर १० मा एमालेबाटै उम्मेदवारी दिएकी ६० वर्षीया टुमरा दमाई, त्रिवेणी नगरपालिका-७ मा कांग्रेसबाट ६० वर्षीया औलादेवी लुहार र हिमाली गाउँपालिका-१ मा माओवादी केन्द्रकी उम्मेदवार ३६ वर्षीया रुपसरी कामी निर्विरोध निर्वाचित भएका छन्।

त्यस्तै, बझाङको साइपाल गाउँपालिका-१ मा कांग्रेसबाट दलित महिला सदस्यमा उम्मेदवारी दिएकी ३६ वर्षीया सुरती कामी, वडा नम्बर ४ मा कांग्रेसबाटै ४२ वर्षीया अम्रिता कामी, केदारस्यूँ गाउँपालिका-४ मा दलित महिला सदस्य कोटामा स्वतन्त्र उम्मेदवारी दिएकी ५५ वर्षीया कन्थरीदेवी ओखेडा, केदारस्यूँ ७ की माओवादी केन्द्रबाट दलित महिला सदस्यकी उम्मेद्वार ५३ वर्षीया रम्भुदेवी कामी निर्विरोध निर्वाचित भएका छन्।

बझाङकै जयपृथ्वी गाउँपालिका-४ मा कांग्रेसबाट दलित महिला सदस्य कोटाकी उम्मेदवार ५५ वर्षीया पुतलीदेवी कामी र वडा नम्बर ७ की दलित महिला सदस्य कोटामा एमालेकी उम्मेदवार ५३ वर्षीया सन्तोला चुनारा, थलारा गाउँपालिका-६ मा एकीकृत समाजवादीबाट महिला सदस्यको कोटाकी उम्मेदवार ३४ वर्षीया सुनीतादेवी गिरी, वडा नम्बर ८ मा एमालेबाट ४३ वर्षीया जमुनादेवी खड्का, मष्टा गाउँपालिका-७ मा एमालेबाट दलित महिला सदस्या कोटामा उम्मेदवार ५१ वर्षीया हिमकला दमाई निर्विरोध भएका छन्।

दार्चुलाको अपिहिमाल गाउँपालिका-३ मा एमालेबाट दलित महिला सदस्य उम्मेद्वार २४ वर्षीया सोभा टमटा, दार्चुलाकै मार्मा गाउँपालिका-५ मा एमालेबाटै महिला सदस्य कोटाकी ३४ वर्षीया कमला महता पनि निर्विरोध निर्वाचित भएका छन्। आयोगले सार्वजनिक गरेको विवरणलाई हेर्दा सुदूरपश्चिममा कुनै पनि पदमा पुरुष निर्विरोध निर्वाचित नभएको देखिएको छ।