काठमाडौं । कोभ्याक्स सुविधाअन्तर्गत थप २३ लाख डोज कोभिडविरुद्धको पेडियाट्रिक फाइजर खोप नेपाल आइपुगेको छ ।
देशका २७ जिल्लाका ५ देखि ११ वर्ष उमेर समूहका बालबालिकालाई लगाउन फाइजर बायोन्टेकको २२ लाख ९९ हजार २ सय पेडियाट्रिक खोप आइतवार काठमाडौं आइपुगेको हो ।
कतार एयरको उडानमार्फत आएको यो खोप पहिलो चरणमा फाइजर खोप लगाएका ५ देखि ११ वर्ष उमेर समूहका बालबालिकालाइ दोस्रो डोजको लागि प्रयोग गरिने बताइएको छ ।
५ देखि ११ वर्ष उमेर समुहका ३९ लाख बालबालिकालाई दुई मात्रा खोप दिनका लागि आवश्यक ठानिएको ८४ लाख डोज खोप अनुदानमा उपलब्ध गराउने प्रतिवद्धतासहित कोभ्याक्स खोप आएको हो ।
माइनस ७० डिग्रीसम्मको तापक्रममा भण्डारण गर्नुपर्ने भएकोले नेपालले आफ्नो क्षमता अनुसार चरणवद्ध रुपमा खोप मगाउने गरेको छ । यसअघि कोभ्याक्स मार्फत गत ६ असारमा पनि २२ लाख डोज खोप आएको थियो । सरकारले गत ९ असार देखि पहिलो चरणमा देशका २७ जिल्लाका बालबालिकाहरुलाई कोभिडविरुद्धको खोप दिन सुरु गरेको थियो ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
