चामल बोरामा २०० रुपैयाँसम्म महँगियो, भारतीय निर्यात प्रतिबन्धको हल्ला

काठमाडौं। पछिल्लो समय चामलको बजार मूल्य झन् झन् उकालो चढेको थोक तथा खुद्रा व्यापारीहरुले बताएका छन्।

भारतले धान तथा चामल निर्यात पनि रोक्ने तयारी गरेको भारतीय संचारमाध्यमहरुले लेखे। त्यसको प्रभाव नेपाली बजारमा पनि देखिन थाल्यो। भारतीय संचारमाध्यमहरुमा उक्त समाचार आएसँगै नेपाली बजारमा चामल महँगिन सुरु भएको थियो। तर त्यतिबेला नजानिँदो गरी सामान्य बढेको चामलको मूल्य अहिले झन् उकालो लागेको हो।

जबकि भारत सकारका अधिकारीहरुले चामल निर्यातमा निषेधको तत्काल योजना नरहेको प्रष्ट पारिसकेका छन्। संसारका धेरै देश भारतीय चामलमा निर्भर रहेकाले अहिले खाद्यान्नको चरम मूल्यवृद्धिका बीच निर्यात रोक्दा ती देशहरुमा महँगी झन् चर्चिने भन्दै भारतले चामल निर्यातमा प्रतिबन्धको योजना नहरेको बताएको छ।

तर नेपालमा अझै पनि भारतले निर्यात प्रतिबन्ध लगाउने हल्लाको बलमा चामलको बजार मूल्य बढाइएको छ। केही सातामै विभिन्न जातका चामल बोरामै दुई सय रुपैयाँसम्म बढेको बिक्रेताहरुले बताएका छन्।
अहिले बजारमा चामलको मूल्‍य बोरामै कम्तिमा एक सय १५० रुपैयाँ बढेको व्यवसायीहरुले बताएका छन्। बजारमा सबैभन्दा बढी बिक्री हुने जिरा मसिनो चामलको मूल्य थोकमै बोरामा २५ किलोको १७ सय रुपैयाँ पुगेको छ। यसअघि यो चामल बोराको १५ सय ५० रुपैयाँ हाराहारी थियो।

यस्तै, २० किलोको बोरामा आउने लङ ग्रेन चामलको मूल्य बोरामा २ सय रुपैयाँ बढेको व्यापारीहरुले बताएका छन्। यो भनेको एक किलोमै १० रुपैयाँले बढेको हो। पहिले २७ सय रुपैयाँमा बिक्री भइरहेको लङ ग्रेन थकाली बासमती लगायतका चामल यतिबेला प्रतिबोरा (२० किलो० २) रुपैयाँ पर्न थालेको व्यवसायीहरुले बताएका छन्। केही महिनाअघिसम्म अधिकांश लङ ग्रेन चामल बजारमा प्रतिबोरा २२ सय देखि २४ सय रुपैयाँमा बिक्री भएको थियो।