राप्रपाकी महामन्त्री कुन्ति शाहिले कुटिन पार्टीको महिला सङ्गठनका सदस्यहरु

काठमाडौं । राष्ट्रिय प्रजातन्त्र पार्टी (राप्रपा)की महामन्त्री कुन्ती शाहीले पार्टीको महिला सङ्गठनका सदस्यहरूमाथि आक्रमण गरेकी छन् ।

आइतबार सङ्गठनको बैठक चलिरहेका बेला शाही पक्षका महिलाहरूले सङ्गठनकी अध्यक्ष अञ्जना रावल समूहमाथि आक्रमण गरेका हुन् । महामन्त्री शाही नै भौतिक आक्रमणमा उत्रिएको सङ्गठनकी अध्यक्ष अञ्जना रावलले बताएकी छन् ।

पार्टी अध्यक्ष राजेन्द्र लिङ्देनले महिला सङ्गठनको अध्यक्षमा असार २ गते रावललाई नियुक्ति दिएको थियो । रावलको नियुक्तिको विषयलाई लिएर सङ्गठनको एउटा पक्ष असन्तुष्ट थिए । भर्खरै पार्टीमा आएको व्यक्तिलाई अध्यक्ष नमान्ने उनीहरूको अडान थियो ।

यसैबीचमा राप्रपाले महिला सङ्गठनलाई महिला हिंसाविरुद्धमा धर्ना दिन र गृह मन्त्रालयमा ज्ञापनपत्र बुझाउन निर्देशन दिएको थियो । त्यसलाई कार्यान्वयन गराउनका लागि आज रावलले सङ्गठनको अनौपचारिक बैठक बोलाएकी थिइन् ।

आज बैठकबाट महिला हिंसा विरोधी अभियानको स्लोगन बनाउने र फन्ड जुटाउने विषयमा छलफल गर्ने रावलको योजना थियो । तर कुमारी तामाङले रावललाई अध्यक्ष नमान्ने बताउँदै आफैँले बैठकको अध्यक्षता गर्न खोजेकी थिइन् । उनले महिला सङ्गठनको साटो पार्टीको महिला विभागले नै अभियान अघि बढाउनुपर्ने प्रस्ताव गरेकी थिइन् ।

यसैक्रममा तामाङ पक्षका केही महिलाहरूले आफ्नो पक्षका महिलालाई हातपात गरेको रावलले बताएकी छन् । कुमारी तामाङले सङ्गठन भन्दा बाहिरका ५–७ जना साथीहरू ल्याएको र उनीहरूले हातपात गरेपछि तनाव सुरु भएको रावलले बताइन् ।

बैठकमा हात हालाहाल भएपछि महामन्त्री शाहीलाई खबर गरिएको थियो । शाही बैठकमा आएपछि उल्टै आफै आक्रमणमा उत्रिएको उनी आफैँले निर्मला न्यौपानेलाई कुटपिट गर्दै कपाल भुत्ल्याएको रावलको दाबी छ ।

घटनापश्चात् रावलले पार्टी अध्यक्षलाई र अनुशासन विभागलाई ज्ञापनपत्र बुझाएकी छन् । ज्ञापनपत्रमा कुन्ती शाही र कुमारी तामाङलाई पार्टीको साधारण सदस्यसमेत नरहने गरी कारबाही गर्न माग गरिएको छ ।