उपमेयर पुगे फोहर व्यवस्थापनका लागि डस्टबिन लिएर पसल पसलमा

सप्तरी । फोहर व्यवस्थापन अभियानमा जुटेको राजविराज नगरपालिकाले नगर क्षेत्रमा फोहर राख्ने डस्टबिन बितरण सुरु गरेको छ ।
उपमेयर इसरत परवीनको नेतृत्वमा निस्केको नगरपालिका कर्मचारीको टोलीले बजार क्षेत्रका ५ सय पसललाई डस्टबिन बितरण गरेको हो । सो क्रममा पसल संचालकहरुलाई फोहर सोही डस्टबिनमा राख्न र नगरपालिकाका सफाई कर्मचारीहरु ट्याक्टर लिएर आउँदा सोमा फोहर फ्याली सहयोग गरिदिन आग्रह समेत गरिएको छ ।

पसल बाहिर राख्दा हराउने र चोरी हुने सम्भावना रहेकाले पसल बन्द गर्दा उक्त डस्टबिन सुरक्षित साथ राख्न समेत पसल संचालकहरुलाई भनिएको छ । जथाभावी फोहर फ्याल्नेलाई फोहर सामाग्रि राख्न सामान उपलब्ध गराइएको भन्दै उपमेयर परवीनले सोको बरखिलापप गर्नेलाई फोहर व्यवस्थापन नियमावली अन्तरगत कारवाही हुने भन्दै सचेत समेत गराएकी छिन् ।

डष्टविन वितरण कार्य बजार क्षेत्रमा ३÷४ दिनसम्म जारि रहने उनको भनाई छ । सो क्रममा नगरपालिकामा दर्ता भए नभएका पसलहरुको विवरण संकलन कार्य पनि गर्न थालिएको र दर्ता नभएका पसललाई अविलम्ब नगरपालिकामा दर्ता गराउन सचेत गराउन थालिएको प्रमुख प्रशासकीय अधिकृत भोगेन्द्र प्रसाद यादवले जानकारी दिए ।

विगतमा नगरको फोहर संकलन बिहानको समयमा हुँदै आएकोमा अब साँझको समयमा समेत फोहर संकलन र व्यवस्थापनको काम हुने नगरपालिकाले जनाएको छ । राजविराज नगरपालिकाको मेयर हाल निलम्बित अवस्थामा रहेकाले फोहर व्यवस्थापनमा उपमेयरले सक्रियता देखाउनु सकारात्मक रहेको नगरवासीको भनाई छ ।