काठमाडौं । चर्चित बलिउड अभिनेत्री मनीषा कोइरालाले आसन्न प्रतिनिधिसभा र प्रदेशसभाको निर्वाचनमा राष्ट्रिय प्रजातन्त्र पार्टी (राप्रपा)लाई विजयी गराउन आम मतदातालाई आह्वान गरेकी छिन्।
शुक्रबार काठमाडौंमा आयोजित राप्रपाको चुनावी सभामा बोल्दै उनले राजेन्द्र लिङदेनको नेतृत्वबाट आफू प्रभावित भएकाले आफूले राप्रपाका उम्मेदवारलाई रोजेको पनि स्पष्ट पारिन्।
भ्रष्टाचार गर्नु आमाको रगत खानु सरह रहेको कुरा लिङदेनले भनेपछि आफू त्यसको पक्षमा मनैदेखि उभिएको उनको भनाइ थियो । अभिनेत्री कोइरालाले वीपीको विचारलाई पनि लिङदेनले आत्मसात गरेकोमा आफूलाई गर्वबोध भएको बताइन्।
‘राजेन्द्रजीको मुख हेरेर आज म यहाँ उभिएकी छु। उहाँले भ्रष्टाचार गर्नु भनेको आमाको रगत खानु हो भन्नु भएको थियो। त्यो कुरा सुनेर मलाई नेपालले असल नेतृत्व पायो भनेर खुशी लाग्यो। त्यसैले म आज यहाँ उभिएकी छु’‚ उनले भनिन्, ‘अरूले बिर्से होला तर राजेन्द्र लिङदेनजीले बिर्सनु भएको छैन वीपी बा (वीपी कोइराला)लाई।’
उनले जनताको आवाजलाई संसद्मा बलियो बनाउन पनि राप्रपाका उम्मेदवारहरूले जित्नुपर्ने तर्क गरिन्। अभिनेत्री कोइरालाले नेपाली जनताले आफूलाई सधैं माया गरेको उल्लेख गर्दै त्यसले आफूलाई गौरवबोध गराएको समेत बताइन्।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
