काठमाडौं । नेपाली कांग्रेसका पूर्वसभापति शेरबहादुर देउवा छ महिनाको उपचारपछि आगामी बिहीबार दिउँसो साढे १२ बजे स्वदेश फर्किँदै हुनुहुन्छ।
जेनजी आन्दोलनका क्रममा भएको आक्रमणमा परी घाइते हुनुभएका उहाँ उपचारका लागि गत फागुन १३ गते विदेश जानुभएको थियो। कांग्रेसको संस्थापन इतर समूहले त्रिभुवन अन्तर्राष्ट्रिय विमानस्थलमा बाजागाजा र सांस्कृतिक झाँकीसहित पूर्वसभापति देउवालाई भव्य स्वागत गर्ने तयारी गरेको छ।
इतर समूहले राष्ट्रिय भेलाका लागि गठन गरेको सांस्कृतिक समितिका संयोजक विद्या तिमिल्सिनाका अनुसार देउवाको स्वागतका लागि विशेष सांस्कृतिक झाँकी निकालिनेछ। कांग्रेस नेता डा. प्रकाशशरण महतका अनुसार पूर्वप्रधानमन्त्रीसमेत रहनुभएका देउवा बिहीबार मध्यान्ह साढे १२ बजे थाई एयरमार्फत काठमाडौं अवतरण हुनेछन्। स्वदेश फर्किएलगत्तै देउवा शुक्रबार सुकेधारास्थित मिराकल पार्टी प्यालेसमा आयोजना हुने इतर समूहको तीनदिने राष्ट्रिय भेलामा सहभागी हुनुहुनेछ।
इतर समूहको प्रचार–प्रसार समिति संयोजक मीन विश्वकर्माले दिएको जानकारीअनुसार उक्त राष्ट्रिय भेलाको उद्घाटन समारोह शुक्रबार दिउँसो १ बजे सुरु हुनेछ र भेलामा पाँच हजारभन्दा बढी नेता तथा कार्यकर्ताहरूको उपस्थिति रहने अनुमान गरिएको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
