अविरल वर्षाले १० जिल्लाका मुख्य राजमार्ग अवरुद्ध

कान्ति लोकपथ र टोखा–छहरेमा रात्रिकालीन सवारी रोक

​                                                                   फाइल तस्वीर

काठमाडौँ। अविरल वर्षाका कारण देशका १० जिल्लाका विभिन्न सडकखण्ड अवरुद्ध भएका छन्।

बाढी र पहिरोको जोखिम बढेपछि प्रहरीले केही सडकमा राति सवारी साधन सञ्चालनमा समेत रोक लगाएको छ। ​प्रहरी प्रधान कार्यालयका अनुसार काभ्रेपलाञ्चोक, सिन्धुपाल्चोक, रसुवा, रुकुम पश्चिम, लमजुङ, इलाम, नुवाकोट, रोल्पा, पाल्पा र मकवानपुरका मुख्य राजमार्गहरू प्रभावित भएका हुन्। ​

यी सडकमा राति सवारी सञ्चालन बन्द:

​खुर्कोट–नेपालथोक–कटुन्जेबेँसी: बाढीको जोखिमका कारण साँझ ६ बजेदेखि बिहान ४ बजेसम्म सवारी साधन चलाउन रोक लगाइएको छ। ​

कान्ति लोकपथ (मकवानपुर): अपराह्न ५ बजेदेखि बिहान ५ बजेसम्म सम्पूर्ण सवारीसाधन सञ्चालनमा रोक छ। ​

टोखा–छहरे (नुवाकोट): अर्को सूचना नभएसम्म राति १० बजेदेखि बिहान ५ बजेसम्म अत्यावश्यकबाहेक अन्य सवारीसाधन चलाउन पाइने छैन ।  

​पूर्ण रूपमा अवरुद्ध भएका राजमार्ग र सडकखण्ड:

​अरनिको राजमार्ग (सिन्धुपाल्चोक)- इकु पहिरो र लिपिङमा सडक भासिएपछि आवतजावत ठप्प छ। ​

पासाङल्हामु र स्याफ्रुबेंसी सडक (रसुवा)- नदी कटानका कारण त्रिशूली–मैलुङ–स्याफ्रुबेंसी र पहिरोका कारण स्याउपार्किङमा पासाङल्हामु राजमार्ग अवरुद्ध छ।

​सिद्धार्थ राजमार्ग (पाल्पा): सिद्धबाबा सुरुङमार्ग नजिकै खसेको पहिरोले सडक ठप्प बनाएको छ। ​

मेची राजमार्ग (इलाम): राजदुवालीमा हिलो जमेर बाटो बन्द छ। यहाँ वैकल्पिक बाटो प्रयोग गर्नुपर्ने हुन्छ। ​

अन्य राजमार्गहरू: भेरी करिडोर (रुकुम पश्चिम), बेँसीसहर–मनाङ (लमजुङ) र घोराही–थवाङ–रुकुम सहिदमार्ग (रोल्पा) पहिरोकै कारण पूर्ण रूपमा बन्द छन्।

​पहिरो र बाढीको जोखिम यथावत् रहेकाले आवश्यक सावधानी अपनाउन तथा वैकल्पिक मार्ग प्रयोग गर्न प्रहरीले अनुरोध गरेको छ।