काठमाडौं । त्रिशूली नदीमा आएको भीषण बाढीले नुवाकोटको सदरमुकाम विदुरस्थित ऐतिहासिक त्रिभुवन त्रिशूली माध्यमिक विद्यालय पूर्ण रूपमा बगाएको छ।
वि.सं. २००० मा स्थापना भएको यो पुरानो विद्यालय बुधबार बिहान आएको आकस्मिक बाढीको चपेटामा परेको हो। प्रत्यक्षदर्शीका अनुसार विद्यालयमा बिहानको प्रार्थना भइरहेका बेला बाढी आउन लागेको सूचना पाएपछि शिक्षकहरूले विद्यार्थीहरूलाई सुरक्षित स्थानतर्फ लैजाने प्रयास गरेका थिए। भाग्न सफल भएका केही शिक्षक र विद्यार्थीहरूले ज्यान जोगाएका छन् भने समयमा भाग्न नसकेकाहरू बाढीमा परेको हुनसक्ने आशङ्का गरिएको छ।
प्रार्थनाको समयमा विद्यालयमा कति शिक्षक र विद्यार्थी उपस्थित थिए र कति जना सुरक्षित रहे भन्नेबारे आधिकारिक विवरण आउन बाँकी छ। विद्यालयमा भएको क्षतिको यकिन विवरण लिन प्रधानाध्यापक राजेन्द्र दवाडीसँग सम्पर्कको प्रयास गरिए पनि हालसम्म सम्पर्क हुन सकेको छैन।
तिब्बततर्फबाट भोटेकोशी हुँदै त्रिशूली नदीमा आएको यो अकल्पनीय बाढीले रसुवासँगै नुवाकोटका तटीय क्षेत्रहरू तहसनहस पारेको छ। बाढीले विदुरको त्रिशूली बजार क्षेत्रका घर, बस्ती र पूर्वाधारहरू बगाएर ठूलो क्षति पुर्याएको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
