काठमाडौँ। फेरि बाढी आउन सक्ने भन्दै चीनले तिब्बत क्षेत्रमा उद्धार कार्य रोकेको छ। तिब्बतमा हिम पहिरो आउँदा नेपालको रसुवा, नुवाकोट, गोरखा, धादिङ, चितवनलगायत जिल्लामा ठूलो मानवीय र भौतिक क्षति गरेको छ।
तिब्बत क्षेत्रमा भएको क्षतिपछि चीन सरकारले बुधबारदेखि नै उद्धार कार्य जारी राखेको थियो। दुई दिन उद्धार कार्य गरेर शुक्रबारदेखि भने अस्थायी रुपमा उद्धार कार्य रोकिएको चिनियाँ सरकारी समाचार संस्था सिसिटिभीले जनाएको छ। तिब्बत क्षेत्रमा भग्नावशेष थुप्रिएर बनेको तालबाट पुनः बाढी आउने खतरा बढेको सिसिटिभीले लेखेको छ।
जसका कारण हाल भइरहेको उद्धार तथा खोजी कार्य रोकिएको छ। प्रभावित क्षेत्रमा पुगेका आपत्कालीन टोलीलाई एक किलोमिटर पछाडि हट्न निर्देशन दिइएको छ। विनाशकारी पहिरो र बाढीपछि अझै सयौं मानिस बेपत्ता रहेका बेला फेरि बाढीको जोखिम बढेपछि उद्धार कार्य प्रभावित भएको छ।
तिब्बत क्षेत्रमा बनेको ताल फुटेमा नेपालमासमेत असर पुग्ने चेतावनी बाढी पूर्वानुमान महाशाखाले बिहीबार नै दिएको थियो। नेपालसमेत सतर्कता अपाउन आग्रह गरिएको छ। हाल नेपालमा बाढीमा बेपत्ताहरूको खोजी कार्य सकिएको छैन। तीन दिनदेखि निरन्तर बेपत्ताको खोजी तथा उद्धार भइरहेको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
