काठमाडौँ । भोटेकोशीमा आएको विनाशकारी बाढीबाट ठूलो जनधनको क्षति भएपछि भुटानले नेपाललाई १० करोड भारतीय रुपैयाँ (करिब १६ करोड नेपाली रुपैयाँ) आर्थिक सहयोग उपलब्ध गराएको छ।
भुटानका राजा जिग्मे खेसर नाम्ग्याल वाङ्चुकको शाही निर्देशनमा उक्त रकम नेपालको ‘प्रधानमन्त्री दैवी प्रकोप उद्धार कोष’ का लागि प्रदान गरिएको हो। नयाँदिल्लीस्थित नेपाली दूतावासका कार्यवाहक प्रमुख डा. सुरेन्द्र थापालाई नेपालका लागि भुटानी राजदूत मेजर जनरल भेत्सोप नाम्ग्येलले सहयोग रकमको चेक हस्तान्तरण गर्नुभयो। गत अगस्ट २६ मा आएको बाढीले प्रभावित क्षेत्रका नागरिकको राहत, उद्धार र पुनःस्थापनाका लागि यो सहयोग उपलब्ध गराइएको भुटान सरकारले जनाएको छ।
भुटानको शाही सरकार र जनताले बाढीका कारण ज्यान गुमाउनेहरूका परिवारप्रति गहिरो समवेदना व्यक्त गर्दै घाइते तथा प्रभावितहरूको शीघ्र पुनःस्थापनाको कामना गरेका छन्। यो सहयोग विपत्तिको कठिन समयमा दुई देशबीचको प्रगाढ मैत्रीपूर्ण सम्बन्ध, भ्रातृत्व र ऐक्यबद्धताको प्रतीक भएको भुटानी पक्षले उल्लेख गरेको छ।
प्राप्त सहयोग रकम प्रधानमन्त्री दैवी प्रकोप उद्धार कोषमार्फत बाढीपीडितको प्रत्यक्ष राहत तथा क्षतिपूर्तिमा उपयोग गरिनेछ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
