असोज ८ देखि १२ गतेसम्म देशका धेरै स्थानमा भारी वर्षाको जोखिम, असोज १० सबैभन्दा खतरापूर्ण

असोज १० सबैभन्दा खतरापूर्ण

काठमाडौँ । भोटेकोशीमा आएको विनाशकारी बाढीको क्षतिबाट तङ्ग्रिन नपाउँदै नेपालमा अर्को ठूलो मौसमी प्रणालीको असर पर्ने देखिएको छ।

जल तथा मौसम विज्ञहरूका अनुसार बंगालको खाडीमा विकसित भइरहेको न्यूनचापीय प्रणालीका कारण असोजको दोस्रो साता नेपालमा अत्यधिक वर्षा हुने सम्भावना रहेको छ। ​

मौसमविद् डा. विनोद पोखरेलका अनुसार विभिन्न मौसम पूर्वानुमान मोडलहरूले असोज ८ देखि १२ गतेसम्म नेपालका विभिन्न भागमा वर्षाको गतिविधि तीव्र रूपमा बढ्ने संकेत गरेका छन्। यस अवधिमा असोज १० गते (सेप्टेम्बर २६) लाई सबैभन्दा बढी जोखिमपूर्ण दिनका रूपमा हेरिएको छ।

​बंगालको खाडीको प्रणाली र सम्भावित असर ​

उत्तर अण्डमान सागर क्षेत्रमा बनेको न्यूनचापीय प्रणाली पश्चिम-उत्तरपश्चिमतर्फ अघि बढिरहेको छ। भारतीय मौसम विभागका अनुसार यो प्रणाली क्रमशः 'डिप्रेसन्' र 'गहिरो डिप्रेसन्'मा बदलिँदै भारतको ओडिशा र आन्ध्र प्रदेशको तटीय क्षेत्रतर्फ अघि बढ्नेछ। ​नेपालमा यस प्रणालीको सोझो प्रभाव कति पर्छ भन्ने स्पष्ट भइनसके पनि केही मौसमी मोडलहरूले केही स्थानमा ४०० मिलिमिटरभन्दा बढी र अधिकतम ७४१ मिलिमिटरसम्म वर्षा हुन सक्ने देखाएका छन्।

​ध्यान दिनुपर्ने कुरा:

७४१ मिलिमिटर वर्षाको आँकडा मोडलहरूले देखाएको सम्भावित अधिकतम प्रक्षेपण मात्र हो। नेपालसम्म आइपुग्दा प्रणालीको गति, दिशा र शक्तिमा आउने परिवर्तनले वर्षाको मात्रा तय गर्नेछ। ​

सतर्कता र पूर्वतयारीको अपिल

​रसुवा, नुवाकोट र त्रिशूली करिडोरमा भदौ १० गतेको बाढीले पुर्‍याएको क्षतिको उद्धार तथा राहत कार्य अझै जारी रहेका बेला यो नयाँ मौसमी चेतावनी आएको हो। ​

विज्ञहरूका अनुसार यो खबर 'विपद् निश्चित भइसकेको' भनेर आत्तिनका लागि नभई 'सम्भावित जोखिमको सामना गर्न पूर्वतयारी र सतर्कता अपनाउनका लागि' हो। तसर्थ, नदी तटीय क्षेत्रका बासिन्दा, पहिरोको जोखिममा रहेका बस्तीहरू तथा यात्राको योजना बनाइरहेका सर्वसाधारणलाई विशेष सतर्कता अपनाउन र सरकार तथा सम्बन्धित निकायलाई पूर्वतयारीमा जुट्न सुझाव दिइएको छ।