काठमाडौँ । नेपाली कांग्रेसको १५औँ महाधिवेशनअन्तर्गत नयाँ कार्यसमिति चयनका लागि भएको निर्वाचनमा गगनकुमार थापा सभापति पदमा निकै फराकिलो मतान्तरका साथ विजयी भएका छन्।
राष्ट्रिय सभा गृहमा सम्पन्न मतगणनाअनुसार थापाले ६ हजार ५ सय ८४ मत प्राप्त गर्दै सभापतिमा जित हासिल गरेका हुन्। सभापति पदका उनका प्रतिस्पर्धी श्यामकृष्ण खड्गीले ३ सय ७५ मत मात्र प्राप्त गरे। कुल ७ हजार ३९ मत खसेको उक्त निर्वाचनमा ५४ मत बदर भएको निर्वाचन समितिले जनाएको छ।
यसअघि थापालाई सर्वसम्मत रूपमा सभापति चयन गर्ने प्रयास गरिए पनि खड्गीले उम्मेदवारी फिर्ता लिन नमानेपछि निर्वाचन प्रक्रिया अघि बढेको थियो। सभापतिमा उम्मेदवारी दिएका अर्का नेता किशोरसिंह राठोरले भने थापालाई निर्विरोध बनाउने सहमति जनाउँदै आफ्नो उम्मेदवारी फिर्ता लिएका थिए।
सभापति पदको परिणाम सार्वजनिक भइसके पनि अन्य पदाधिकारी तथा केन्द्रीय सदस्यहरूको भने मतगणना सुरु भइसकेको छैन। निर्वाचन समितिका अनुसार बाँकी पदहरूको मतगणना प्रक्रिया छिट्टै अगाडि बढाइनेछ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
