काठमाडौं । कोरोना भाइरसको विश्वव्यापी महामारीका कारण सबैभन्दा बढी प्रभावित देशमध्येमा पर्ने ब्राजिलमा कोभिड–१९ का कारण एक लाख एक हजार भन्दा बढीको मानिसको ज्यान गएको छ ।
दक्षिण अमेरिकी देश ब्राजिलमा कोभिड–१९ बाट अहिलेसम्म एक लाख एक हजार ४९ जनाको ज्यान गएको जोन्स हप्किन्स विश्वविद्यालयको कोरोना भाइरस स्रोत केन्द्रले जनाएको छ । ब्राजिलमा कुल संक्रमितको संख्या ३० लाख ३५ हजार भन्दा धेरै पुगेको छ ।
अमेरिकापछि सबैभन्दा धेरै संक्रमित र ज्यान गुमाउनेको संख्या ब्राजिलमा छ र अझै पनि संक्रमण नियन्त्रणमा आउने संकेत देखिएको छैन ।
ब्राजिलमा पहिलो ५० हजार मानिसको कोरोना भाइरसका कारण मृत्यु हुन तीन महिना लागेको थियो । तर थप ५० हजार भन्दा बढी मानिसको मृत्यु मात्रै ५० दिनमा भयो ।
ब्राजिलमा कोरोना भाइरसको संक्रमण अझै पनि उच्च तहमा रहेको छ तर त्यहाँ पसल तथा रेस्टुरेन्टहरु खुलिसेकका छन् ।
राष्ट्रपति जायर बोल्सोनारोले कोरोना भाइरसको महामारीलाई गम्भीर रुपमा लिएका छैनन् । उनले कोरोना भाइरसविरुद्धको अभियानमा अर्थतन्त्रलाई असर गर्ने कुनै पनि उपाय लागु गर्न दिएका छैनन् ।
आफै पनि कोरोना भाइरसबाट संक्रमित भएका उनले राज्यका गभर्नरहरुले लकडाउन गरे पनि त्यसको विरोध गर्दै आएका थिए । उनी बिना मास्क पनि समर्थकहरुको भिडमा उपस्थित हुने गरेका छन् ।
सहकार्यको अभावमा ब्राजिलमा कोरोना भाइरसको महामारीले अति खराब अवस्था लिएको भन्दै विज्ञले चिन्ता व्यक्त गर्दै आएका छन् ।
विश्वभर अहिलेसम्म कोरोना भाइरसबाट संक्रमित हुनेको संख्या एक करोड ९७ लाख ६९ हजार भन्दा बढी पुगेको छ । त्यसमध्ये सात लाख २९ हजार भन्दा बढीको ज्यान गएको छ ।
सबैभन्दा बढी प्रभावित भएको अमेरिकामा ५० लाख ४१ हजार भन्दा बढी संक्रमित भएकोमा एक लाख ६२ हजार ९ सय भन्दा धेरैको ज्यान गएको छ ।
भारतमा २१ लाख ५३ हजार भन्दा बढी मानिस संक्रमित भएकोमा ४३ हजार तीन सय भन्दा बढीको ज्यान गएको छ ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
