रानाथारू जनजातिमा सूचीकृत भएपछि कैलाली, कञ्चनपुरमा खुसियाली

कैलाली । सरकारले रानाथारू समुदायलाई अलग्गै आदिवासी जनजातिका रूपमा सूचीकृत गर्ने निर्णय गरेपछि कैलाली र कञ्चनपुरमा खुसियाली छाएको छ। यही माघ २० गते बसेको मन्त्रिपरिषद् बैठकले उक्त निर्णय गरेपछि रानाथारुको बसोबास रहेको कैलाली र कञ्चनपुरमा खुसियाली छाएको हो।

राना थारू समुदायको माग र विज्ञको सुझावका आधारमा उनीहरुलाई अलग पहिचान दिइएको हो। त्यो निर्णयसंगै दुई दशक लामो सङ्घर्षपछि राना थारूहरुले अलग्गै आदिवासी जनजातिका रूपमा पहिचान पाएका छन्।

सुचिकृतपछि धनगढीमा दिपावली कार्यक्रमको समेत आयोजना गरिएको थियो। सो अवसरमा बोल्दै प्रतिनिधि सभा सदस्य नारदमुनी रानाले बर्षौ अगाडीदेखि संघर्षपछि सफलता मिलेको बताए। उनले रानाथारू समुदायलाई अलग्गै पहिचान दिएकोमा वर्तमान सरकारलाई धन्यवाद समेत ज्ञापन गरे।

विसं २०६४ मा डा ओम गुरुङको संयोजकत्वमा गठित आदिवासी जनजाति सूची परिमार्जन उच्चस्तरीय कार्यदलले रानाथारूसहित १० जातिको अध्ययन गरी सूची परिमार्जनका लागि सुझाव दिएको थियो।

सरकार र सो समाजबीच २०६९ जेठ १४ मा भएको आठ बुँदे सहमतिको पहिलो बुँदामा रानाथारूलाई आदिवासी जनजातिमा अविलम्ब सूचीकृत गर्ने उल्लेख थियो। विसं २०५६ मा तत्कालीन सरकारले आदिवासी जनजाति सूचीकृत गर्दा आफूहरु छुटेको भन्दै रानाथारु समुदाय निरन्तर आन्दोलित थियो।

कैलाली र कञ्चनपुरमा गरी साढे तीन लाख रानाथारूको बसोबास छ। हालसम्म सो समुदायलाई थारू जनजातिको समग्र पहिचानमा समावेश गरिएको थियो। विसं २०६८ को राष्ट्रिय जनगणनामा रानाथारूसहित गणना गर्दा हाल थारू समुदाय कूल १७ लाख ३७ हजार ४७० ९जनसङ्ख्याको ६ दशमलव ६ प्रतिशत० मानिएको छ।