ओली सरकार नेपालको शिक्षा क्षेत्रलाई तहसनहस गर्न उद्धतः नेता महर

काठमाडौं । नेपाली कांग्रेसका युवा नेता नैनसिंह महरले वर्तमान सरकार नेपालको शिक्षा क्षेत्रलाई तहसनहस गर्न उद्धत रहेको बताएका छन् । राजधानीको नयाँ बानेश्वरमा आयोजित शिक्षा क्षेत्रका चुनौतीहरु र समाधान बिषयक अन्तरक्रिया कार्यक्रममा बोल्दैं नेविसंघका पूर्व अध्यक्ष समेत रहेका नेता महरले ठूलो लगानी र मिहिनेतका साथ तयार पारिएको उच्च स्तरिय शिक्षा आयोगको प्रतिवेदन शैक्षिक माफियाहरुको दबाबमा परेर १ बर्ष बितिसक्दा समेत दराजमा थन्काएर राखेको र सार्वजनिक नगरेको भन्दैं आक्रोश पोखेका हुन्।

केपी शर्मा ओली नेतृत्वको वर्तमान सरकारले संविधानको प्रतिकुल हुनेगरी शिक्षा नीति ल्याएको जसका कारण शैक्षिक वातावरण समेत विथोलिएको नेता महरको भनाई छ । उनले भने विश्वविद्यालयहरुमा व्यापक राजनीतिकरण र भागबण्डा गरेर संस्कृत, पूर्वाञ्चल, मध्यपश्चिमाञ्चल, सूदुरपश्चिमाञ्चल, पोखरा र कृषि तथा वनविज्ञान विश्वविद्यालय र विपी कोईराला स्वास्थ्य विज्ञान प्रतिष्ठानमा लामो समयदेखि नेतृत्वविहिन भएको छ ।

वर्तमान नेकपा सरकारले कुुरा समाजवादका गर्ने तर कामले अवसरवाद उन्मुख भएको भन्दैं नेता महरले आक्रोश पोखे । वर्तमान सरकार हरेक मोर्चामा असफल रहेको भन्दैं काण्डैकाण्डमा तल्लीन समेत रहेको नेता महरको आरोप छ । शिक्षा र स्वास्थ्यमा जनताका छोराछोरीको समान पहुँच पुर्‍याउन शिक्षा र स्वास्थ्य राज्यको नियन्त्रणमा ल्याउनुको विकल्प नरहेको युवा नेता महरले बताए ।

सरकारको आफ्ना मान्छेलाई पोस्ने रबैयाका कारण विश्वविद्यालय निमित्तको भरमा चलिरहेका छन्। निमित्तको भरमा सञ्चालित सबै विश्वविद्यालयको आर्थिक, शैक्षिक तथा प्रशासनिक गतिविधि सुस्त बनेको छ।