महोत्तरीको जलेश्वरमा कलश यात्रा

फागुन ८, २०७६

कालापानी मिडिया

दिपक पाण्डे

महोत्तरी । शुक्रबार हुन लागेको महाशिवरात्रीको पुर्व सन्ध्या अर्थात बिहिबार जलेश्वरमा नगरपरिक्रमा गर्दै कलश शोभा यात्रा निकालिएको छ ।

परापुर्वकाल देखि जलेश्वरनाथ महादेव मन्दिरमा शिवरात्रीको मेला लाग्ने गरेको र लाखौको संख्यामा श्रद्धालुभक्तजनहरु दर्शन गर्न आउने गरेकोमा विगत केहि वर्ष देखि विशेष रुपमा शिवरात्री मनाउन शोभायात्रा निकालिने गरिएको छ । विश्वमै एममात्र जलगुफा भित्र शिवलिंग विराजमान रहेको र यस शिवलिंगको दर्शनले मोक्षको प्राप्ती हुने जनविश्वासका कारण हरेक वर्ष लाखौ श्रद्धालु शिवरात्रीका दिन शिवलिंगको दर्शन गर्ने गरेका छन ।

पछिल्ला बर्ष झैँ यस वर्ष पनि दर्शनार्थीको संख्या लाख कट्ने शिवरात्री पुजा व्यवस्थापन समितिले जनाएको छ । शिवरात्रीकै लागि साजसज्जा तथा लाईन लगाउने देखि अन्य व्यवस्थापन तथा सुरक्षा लगायतको तयारी पुरा भैसकेको जनाईएको छ । यता जिल्ला प्रहरी कार्यालय महोत्तरीका प्रमुख श्याम कृष्ण अधिकारी समेत मेलामा सुरक्षालाई विशेष प्राथमिकता दिइएको र सादा पोशाकमै समेत प्रहरी परिचालन हुने बताए ।

जलेश्वरनाथ महादेव जलभित्र विराजमान रहेका र उक्त जल कुनै पनि मेसिनरी सामानले निकाल्न नमिल्ने भएकोले नेपाली सेना, शसस्त्र प्रहरी, नेपाल प्रहरी तथा नागरिक समाजले समेत गुफा भित्रको जल बाल्टीले नै निकालेर शिवलिंगको दर्शन सर्वसाधारणलाई गराउने गरेका छन । दर्शनार्थीले आजै मध्यरात देखि शिवलिंगको दर्शन गर्न सक्ने छन ।