काठमाडौँ । भुटान २० वर्षमुनिको साफ च्याम्पियनशिप फुटबलको सेमिफाइनलमा प्रवेशको सम्भावना कायमै राखेको छ। सातदोबाटोस्थित एन्फा कम्प्लेक्समा आज भएको खेलमा १० खेलाडीमा सीमित माल्दिभ्सविरुद्ध २–१ ले जित्दै भुटानले सेमिफाइनलमा पुग्ने सम्भावना जीवितै राखेको हो।
भुटानका लागि जिग्मे दोर्जी र नवाङ छोपेलले गोल गरे। हाफटाइमअघि एक गोलले भुटानले अग्रता लिए पनि दोस्रो हाफमा माल्दिभ्सले गोल फर्काउँदै खेल बराबरीमा ल्याएको थियो। गोलरक्षक सोनम तेन्जिङले गरेको फाउलमा रातो कार्ड खाँदै मैदान बाहिरिएिपछि १० खेलाडीमा सीमित भुटानले माल्दिभ्सलाई रोमाञ्चक खेल जितेको हो।
भुटान ५१औँ मिनेटमा १० खेलाडीमा सीमित भएको थियो। गोलकिपर तेन्जिङले पेनाल्टी बक्सबाहिर आएर ह्यान्ड गरेपछि रातो कार्ड खाएका थिए। त्यसमा पाएको फ्रि-किकलाई फिराकले सीधै गोलमा गरेर ५३औँ मिनेटमा बराबरी गर्दै माल्दिभ्सलाई खेलमा फर्काएका थिए। माल्दिभ्सले अब समूह चरणको अन्तिम खेलमा भारतसँग खेल्नेछ।
माल्दिभ्स भारतसँग पराजित भए वा बराबरीमा खेल टुंगिएमा भुटान सेमिफाइनलमा पुग्नेछ। समूह ए बाट नेपाल र बंगलादेश सेमिफाइनलमा पुगिसकेका छन् भने श्रीलंका प्रतियोगिताबाट बाहिरिएको छ। समूह चरणको अर्को खेलमा नेपालले भोलि बंगलादेशसँग खेल्ने तालिका छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
